Nagpanawagan ni Okinawa Governor Genta Koja ti naan-anay a pannakarepaso ti 1960 Japan-US Status of Forces Agreement (SOFA) kalpasan ti maipagarup a panangpapatay ti maysa a US Marine iti 39-anyos a babai a Hapones iti maysa nga hotel sadiay Okinawa.
Pinagduaduaan ni Koja ti katulagan, a mangipapaay iti naisangsangayan a pannakatrato kadagiti military personnel ti US, agraman ti kangrunaan nga otoridad ti militar ti Amerika a mangimbestiga ken mangdisiplina kadagiti soldado a nakadestino idiay Japan bayat ti opisial a trabahoda.
Impapilit ti gobernador a karaman iti rebision ti madagdagus a pannakaisuko dagiti suspek iti kustodia ti Japan sakbay a maipila ti darum, kasta met ti pannakayaplikar dagiti linteg ti Japan kadagiti military personnel ti US.
Kabayatanna, immanamong ti Japan ken Estados Unidos a mangipatungpal kadagiti kanayonan nga addang tapno malapdan dagiti krimen a pakairamanan dagiti military personnel ti Amerika idiay Okinawa, agraman ti panangpaatiddog iti 30 nga aldaw a curfew para iti dadduma a soldado nga Americano agingga iti Disiembre 7.
