Impangato ti National Food Authority (NFA) iti P30 kada kilo ti buying price ti nadalus ken namaga nga irik ken napaadu iti 500 a sako kada cropping season ti limitasion ti mailako ti kada mannalon.
Segun ken ni NFA Administrator Larry Lacson, umabot iti 80 a porsiento dagiti sangay ti ahensia iti intero a pagilian ti gumatgatang kadagiti irik iti nasao a presio, idinto a P28 kada kilo met ti kababaan a buying price.
Gagem ti addang a maipangato ti pastrek dagiti mannalon, maallukoy ida nga agmula iti baet ti pangta ti El Niño ken mapapigsa ti rice reserves ti gobierno.
Nangilatang pay ti Department of Agriculture iti nayon a P10 bilion ken gumatang iti 150 mobile procurement trucks tapno mapabileg ti panaggatang iti irik, nangruna kadagiti adayo a lugar.
