Target ti Philippine Health Insurance Corporation (PhilHealth) nga umabot iti 60 milion ti benepisiaryo ti Yaman ng Kalusugan Program (YAKAP) inton madanon ti katapusan ti 2027.
Segun ken ni PhilHealth President ken CEO Beverly Lorraine Ho, umaboten iti 22 milion ti naka-enroll idi Oktubre 2026 ken manamnama nga agbalin a 27 milion sakbay nga agtapos ti tawen.
Sakup ti programa ti konsultasyon, outpatient medicines ken cancer screening, idinto a mapalawa manipud 75 nga agbalin a 135 dagiti agas a mabalin a maala a libre mangrugi inton Enero 2027.
Gagem ti YAKAP a mayawis ti nasapa a panagpakonsulta ken maksayan ti gastos iti salun-at, ket mabalin nga agparehistro dagiti miembro babaen iti eGovPH app wenno direkta a mapan kadagiti PhilHealth-accredited clinic.
