Impakaammo ni Atty. Neri Colmenares, maysa kadagiti abogado ti prosekusyon iti kaso kontra ken ni dati a Presidente Rodrigo Duterte nga agtultuloy ti panagsagana da para iti umadani a pormal a panagdengngeg inton Nobiembre 30 iti International Criminal Court (ICC).
Segun ken ni Colmenares, iti agdama ket adu pay ti isyu ken nakapenpen a mosion nga iur-uray da a desisyonan ti korte sakbay a mangrugi ti panagdengngeg.
Karaman kadagiti kangrunaan a matratratar ti panangipakita ken pakabigbigan ti nasurok-kumurang 70 a testigo nga insagana ti kampo-da.
Nagkiddaw pay ti prosecution ti protective order iti korte tapno masigurado ti kinatalged dagiti testigo, pakairamanan ti panagaramat ti sound distortion, panangilemmeng kadagiti nagan da ken panangliklik iti panagirruar ti rupa da iti publiko.
