Nakabantay ti Philippine Ports Authority (PPA) ken Philippine Coast Guard (PCG) kontra iti posible a pananggundaway dagiti fixer kadagiti pasahero nga agbiahe ita nga Undas, segun ken ni PPA Spokesperson Eunice Samonte.
Im-imbestigaran ti PCG ti nairekord nga insidente ti fixing iti Batangas Port, a dagiti karaman ket nagpammarang nga agilaklako iti nalaka a ticket ngem nangin-ngina ti masingir a presio kadagiti pasahero.
Impasigurado ni Samonte nga agar-aramiden iti addang dagiti dua nga ahensia tapno maliklikan t isu met laeng nga insidente ita nga Undas, uray awan pay naaw-awatda a baro a reklamo mainaig iti nasao a banag.
Kabayatanna, namnamaen ti PPA nga umabot iti 1.93 milion a pasahero ti agbiahe kadagiti pantalan ita nga Undas, nakurang dua a porsiento a nangatngato ngem iti aktwal a bilangna idi napan a tawen.
