Inlawlawag ti Ilocos Sur Cooperative Incorporated (ISECO) kadagiti konsyumer no apay a ngimmina ti singir iti koriente ita a bulan ti Oktubre.
Dayta ket kalpasan a nakaawat ti ISECO iti adu a reklamo nangruna iti social media.
Iti pannaki-uman ti Bombo Radyo Vigan ken ni Ernesto Galla Jr., 24 centavos ti ngimminaan ti singir iti koriente wenno P13.47 ita a bulan.
Kaaduan a mairekreklamo ket dagiti pass through charges a masingsingir ket kinunana a saan daytoy a sumrek iti ISECO no di ket mapan iti transmission, generation, lifeline, ken dadduma pay a universal charges.
Kinuna pay ni Galla a ti generation ket isu ti bayad ti koriente a masingir ken mai-remit iti generation company isu nga awan ti pastrek dita ti ISECO.
Ti met transmission charges ket isu ti mapan iti National Grid Corporation of the Philippines idinto a dagiti dadduma pay a mabayadan ket mapan met iti Power Sector Assets and Liabilities Management.
Malaksid dayta, ti met VAT-exempt charges ket isu dagiti government-mandated charges kas koma ti lifeline discount ken systems loss.
Innayon ti opisial a saan laeng a ti ISECO ti makaaw-awat iti reklamo ta uray ni Energy Secretary Sharon Garin ket aminado a parikut daytoy iti intero a pagilian.
