Plano ti Department of Agriculture (DA) nga idalan iti nasurok-kumurang P80-B a gatad dagiti farm-to-market road tapno mapadaras ti panagaramid iti kalsada kadagiti rural area.
Segun ken ni Agriculture Secretary Francisco Tiu Laurel Jr., makitinnulong ti ahensia iti World Bank ken International Finance Corp. tapno mangaramid iti sistema para iti nasao a proyekto.
Innayon ni Laurel a makatulong dagiti farm-to-market road tapno mairuar ken mailako dagiti mannalon dagiti produktoda, nangruna kadagiti lugar a nangato ti lebel ti kinarigat.
Malaksid dayta, adda P33-B a pondo ti DA para iti 2026 a nailatang iti pannakaipatakder ti 2,300-kilometer a farm-to-market road iti salinong ti 1,605 proyekto, a manamnama a marugian a maaramid inton Disyembre.
