Pinaglibakan ni dati a Bangsamoro Parliament Member Sultan Edrieza Nasser Rimbang ti pannakairamanna iti nakumpiskar a 521 kilos a shabu nga aggatad iti ₱3.5 Bilion a nasalamaan idiay Laos, kalpasan nga intudo ti Department of the Interior and Local Government (DILG) kenkuana kas ti maipagarup a financer ken mastermind iti plano a mangipuslit iti kontrabando iti Manila babaen kadagiti chartered planes.
Binabalaw ni Rimbang no nangalaanna iti dakkel a gatad a kuarta a pangpondo iti nasao nga illegal operation ket nagkiddaw iti pormal nga imbestigasion tapno mapaneknekan ti kinapudno ken madalusan ti naganna.
Segun iti dati nga opisial, dakkel ti nagbalin nga epekto iti pamiliana ti panagwaras dagiti ladawan ken saaan a husto nga impormasion, nangruna iti panagadal dagiti annakna. Gapu iti daytoy, mangbukel metten iti legal nga addang ti kampo kaduana dagiti abogadona tapno maipila iti kaso kontra kadagiti nagiwaras iti mapapati a saan a pudno a pammabasul kenkuana.
