Pinadayawan ni House Speaker Faustino “Bojie” G. Dy III ti pimmusay a dati a Speaker Pro Tempore Raul A. Daza gapu iti nasurok limapulo a tawen a panagserbi na iti pagilian.
Iti mensahe ni Dy a binasa ni Senior Deputy Speaker Ferdinand “Dinand” Hernandez iti seremonia ti panangpadayaw ken Daza iti Kamara, kinunana a pagbalinen koma a pagwadan dagiti agserserbi iti publiko ti dedikasion ken prinsipio ti dati a kongresista ti Northern Samar.
Umuna a nabotasan ni Daza iti House of Representatives idi 1969, ket nagserbi iti pito a termino kas agpampanday linteg. Nagserbi isuna kas Speaker Pro Tempore ken Senior Deputy Speaker. Nagbalin a gobernador ti Northern Samar iti tallo a termino manipud 2001 agingga 2010, ken nangiggem kadagiti sabali pay a saad iti gobierno.
Segun ken Dy, saan laeng a ti atiddog a panawen ti panagserbi ni Daza ti nangted iti pateg ti biagna, no di ket ti dedikasion ken panangipategna kadagiti umili, nangruna kadagiti tattao iti Northern Samar.
Ginuyugoy ni Dy dagiti agpampanday linteg a mangisina kadagiti nagduduma a kapanunotan iti politika ken agtitinnulong para iti pagimbagan dagiti Pilipino. Kinunana a temporaryo laeng dagiti saad iti gobierno, ngem agtalinaed dagiti naimbag a naaramid ken dagiti tattao a natulongan.
Nagyaman ti Speaker iti pamilya ni Daza gapu kadagiti sakripisio ken suporta dagitoy iti atiddog a panagserbi na iti pagilian.
Pinadayawan ni Dy dagiti kontribusion ni Daza iti Kamara, ti ayatna iti Northern Samar, ken ti intero a biagna a panagserbi iti ili ken iti sambayanang Pilipino.
