Ibilang ni 1PWD Partylist Rep. JD Castro nga insulto iti sektor ti persons with disabilities wenno PWD ti mapapati a panang-bully ken ni Josh Aquino iti podcast ti Machong Chismisan.
Dayta ti imbaga ni Castro kasaruno ti panangipilada iti reklamo iti National Bureau of Investigation wenno NBI kontra kadagiti karaman iti nasao a podcast.
Iti pannaki-uman ti Bombo Radyo Vigan ken ni Castro, kas maysa nga advocate ken maysa nga addaan iti rangkap, saanda a palabsen ti insidente ta kayatda a maikkan turay dagiti PWD ken mailaban dagiti karbenganda.
Impaganetget ti agpampanday-linteg a kayatda a baliwan ti kapanunotan ti publiko nga awan serserbi dagiti PWD, nangruna ta isu ti nadakamat iti podcast a kunana ket nakasakit iti dignidadda.
Inyunay-unayna pay a saanda nga agsardeng a mangisakit iti sektor tunggal adda maibaga wenno tignay a mangpasakit kadagiti PWD.
Inlawlawagna met a daytoy ket saan laeng a para ken ni Josh ken iti pamiliana, no di ket para pay iti pagsayaatan ken dignidad ti PWD community.
