Binabalaw ni Sen. Erwin Tulfo ti mapapati a diskriminasion ken panang-bully ken ni Josh Aquino mainaig kadagiti nadakamat iti maysa a podcast.
Segun ken ni Tulfo, saan a nasken nga aramiden nga angaw wenno pagkakatawaan ti rangkap ken saan daytoy a nasken nga agbalin a rason tapno tagibassiten ti dignidad ti maysa a tao.
Kwinestionaran pay ti senador a no makapadas iti kastoy a diskrimasion ti maysa a PWD manipud iti mabigbigbig a pamilia ket kasano laengen dagiti gagangay a Pilipino nga adda rangkapna nga inaldaw a mauy-uyaw.
Plano ti senador ti mangipila kadagiti sumaruno nga aldaw wenno lawas iti gakat a mangted iti nayon a proteksion kadagiti persons with disabilities (PWDs), senior citizens ken Indigenous Peoples (IPs), agraman ti panangipataw iti pannusa ken pannakaibalud no mapaneknekan a nagbasulda iti panang-bully iti sao wenno aramid kontra kadagitoy.
