Agsagsagana ti Department of Social Welfare and Development (DSWD) para iti manamnama nga iseserrek ti Super Typhoon Champi iti Philippine Area of Responsibility (PAR) ita a lawas babaen ti panangisagana kadagiti relief goods para kadagiti mabalin a maapektaran a komunidad.
4,571,390 a family food packs, 344,942 non-food items ken 204,745 ready-to-eat food packs ti naurnong kadagiti bodega ti ahensia iti intero a pagilian tapno masigurado ti dagus a pannakaidanon ti tulong kadagiti agkasapulan.
Agtultuloy met ti panagpataud dagiti kangrunaan a production hubs ti DSWD kadagiti family food packs tapno mataginayon ti umdas a suplay ti relief goods ken mapapartak ti panagresponde kadagiti mabalin a didigra.
Bambantayan ti DSWD dagiti report ti PAGASA ta posible nga apektaran ti bagyo ti Northern Luzon, Cagayan Valley ken iti amianan a paset ti Ilocos Region inton ngudo ti lawas.//via Bombo Cyrelle Ann Rosario
