Dua a drayber ti nadunor iti panagdinnungpar ti motorsiklo ken traysikel iti Salcedo Road, Barangay Poblacion Norte, Salcedo, Ilocos Sur.
Ti motorsiklo ket minaneho ti lalaki nga agtawen iti uppat a pulo ket dua, taga-Barangay Sorioan.
Ti met traysikel ket minaneho ti lalaki nga agtawen iti limapulo ket tallo, agnaed iti Barangay Poblacion.
Bumallasiw koman ti traysikel a mapan iti laud a direksion idin ta dimteng ti napaspas ti patarayna a motorsiklo ket naidungpar iti sango a pilid ti traysikel.
Nadunor ti ulo ken nadumaduma a paset ti bagi ti drayber ti motorsiklo, idinto a ti drayber ti traysikel ket nasakit ti bagbagina.
Naipaagasda iti ospital para iti naan-anay a pannakatamingda.
Naduktalan pay a ti drayber ti motorsiklo ket nakainom idi napasamak ti aksidente.
