Kinanselar ti Department of Agriculture babaen iti pammilin ni Agriculture Secretary Francisco Tiu Laurel Jr., ti import permit para iti P700 million rice shipment manipud Vietnam gapu iti pannakaidumduma ti klase ti bagas ken ti panag-expire ti kontrata.
Ti barko nga MV Tay Son 2 ket nagkarga iti 12,480 a metriko tonelada ti bagas nga immuna a naituding a sumangpet idi Hulyo.
Kalpasan a simmangpet idiay Davao idi Setyembre 14, nagkedked ti kapitan a dumalan ti barko iti inspection ti Bureau of Plant Industry (BPI), isu a nangiruar ti DA iti hold order ken inalertoda dagiti otoridad.
Insingasing ti Bureau of Plant Industry nga isubli idiay Vietnam ti kargamento, idinto nga ad-adalen met ti Bureau of Customs ti posible a panangkumpiskar kadagitoy ken panangipataw iti naan-anay a pannusa.
