Im-imbestigaran ti National Bureau of Investigation dagiti sanikua a mainaig kada Vice President Sara Duterte ken Davao City Rep. Pulong Duterte gapu iti maipagarup a dakkel a panagduma iti naideklarar a gatad kadagiti Statement of Assets, Liabilities and Net Worth da ken iti aktwal a gatad.
Segun ken ni NBI Director Melvin Matibag, suksukisoken ti ahensia no agpada ti aktwal a gatad dagiti sanikua iti gatad a naideklarar iti SALN ti bise presidente.
Basar iti initial investigation ti NBI, naduktalan ti panagduma iti gatad dagiti 24 a sanikua nga indeklarar ni Duterte ken ti asawa a ni Atty. Manases Carpio.
Pakairaman daytoy iti maipagarup a maysa nga agricultural land idiay Barangay Catigan a saan a naideklarar a gatad nga P890, 000 ngem mapatta-patta nga aggatad ti P61 milyon.
