Nakasaganan ti Alpha Kappa Rho Fraternity and Sorority – Ilocos Sur Supreme Council para iti umadani a Dugong Bombo 2026 Blood Letting Program ti Bombo Radyo inton November 14, 2026.
Kagiddan iti naisayangkat a signing iti Memorandum of Agreement iti nagbaetan ti nasao a fraternity group ken ti Bombo Radyo Vigan, impaganetget ni Provincial Grand Skeptron Mark Kevin Alagao nga idi pay laeng kalkalpas ti Dugong Bombo 2025 ket nabagaanen dagiti nadumaduma a chapter nga agidonarda manen iti dara para iti daytoy a tawen.
Impasigurado ni Alagao ti suporta ken kaaddanto dagiti chapter manipud iti 1st ken 2nd district ti probinsia a makipaset iti nasao a blood letting.
Mapatta-patta a nasurok 10 iti kada chapter ti manamnama a makipaset iti nasao nga aktibidad.
Nupay kasta, inawisna met dagiti dadduma pay nga umaydanto agidonar iti dara tapno matulongan dagiti agkasapulan ken mabenepisyaran ti bagi.
