Nasukatan dagiti aglaklako kadagiti lima a puesto ti empanada iti Plaza Burgos, Vigan City gapu iti mapapati a manon a daras a panaglabsingda kadagiti pagannurotan nga intuding ti city government.
Iti pannaki-uman ti Bombo Radyo Vigan ken ni Mayor Randy Singson, manon a daras a naikkanda ti gundaway dagitoy nga aglaklako kalpasan ti nagsasaruno a taripnong ken panangballaag kadakuada, ngem itultuloyda latta nga aramiden dagiti maiparit.
Uray dagiti promissory note a pinermaan dagiti aglaklako a nangikarianda a saandan nga uliten dagiti panaglabsingda ket saanda latta a nagtungpal.
Karaman kadagiti maiparit nga intultuloyda latta nga inaramid ket ti panangibilagda iti alikamenda kadagiti pader, panagibelleng ti manteka ken panaginnawda iti kanal.
Nabilin pay dagiti aglaklako a dalusanda ti puestoda iti linawas ngem saanda a tinungpal.
Malaksid dayta, nakaawat pay ti city government iti reklamo mainaig iti panagririri dagiti aglaklako gapu iti panagiinnagawda kadagiti customer.
Kinuna ni Singson a saan a nasayaat a kitaen ti kastoy a sitwasion, nangruna ta makitkita dagiti customer ken turista a bumisbisita iti Plaza Burgos.
Inlawlawag ti mayor a naaddaan iti naan-anay a gundaway dagiti aglaklako tapno ilintegda ti aramidda sakbay a naaramid ti addang a pannakasukatda.
