Agtultuloy ti panagimbestigar ti Bantay Police Station mainaig iti napasamak a pammaltog idiay Zone V, Bantay, Ilocos Sur partikular iti sangwanan ti Land Registry Authority.
Iti pannaki-uman ti Bombo Radyo Vigan ken ni PLT. Donne Alfred Gamueda, awan pay ti nalawag a motiboda no apay a pinapatayda ti biktima a babai babaen kadagiti dua a riding-in-tandem.
Iberberipika met ti kapulisan ti kaso a nakainaigan ti biktima iti ili ti San Vicente ken no posible nga adda pakainaigan ti panangpapatayda kenkuana iti panagilaklakona iti daga.
Kabayatanna, agtaltalinaed met iti Intensive Care Unit ti live-in partner ti biktima nga agtawen iti uppat a pulo ket maysa a taga-Vigan City idinto a ti drayber ket natalgeden ti kasasaadna.
Naala iti nakapasamakan ti pammaltog ti 17 agingga 18 a basyo ti bala ti paltog.
Maipalagip a ti biktima ket naggapu iti LRA a nagilakad iti dokumento ket sumrek koma iti naglugananda nga SUV idin ta pinaltugan dagiti suspek idinto a nadunor met ti live-in partner-na ken ti drayberda.
