Ibilang ni University of Northern Philippines Dr. Erwin Cadorna a dakkel a dayaw saan laeng nga iti local, national no di ket uray iti international ti balligi ti unibersidad.
Dayta ket kalpasan nga adda dua a nursing graduate ti nagbalin a topnotcher nga isuda Dianne Tolentino a Top 1 ken ni Josian Vince Bermio a Top 9.
Iti pannaki-uman ti Bombo Radyo Vigan ken ni Cadorna, napalalo ti ragsakna ta iti kaunaan a gundaway iti pakasaritaan ti UNP College of Nursing ket nakapataudda iti Top 1.
Impannakkel pay ni Cadorna a ti laeng UNP ti adda Top 10-na manipud kadagiti state universities and colleges iti Region 1 para iti daytoy a board exam.
Namnamaen ti UNP president a daytoy a balligi dagiti dua a graduate ket agserbi nga inspirasion tapno ipasnek ti panagadal.
Impasiguradona met ti suportana kadagiti saan pay a nakapasa ket kinunana a saanda a maawanan ti namnama ta adda latta gundaway a sumaruno.
Kabayatanna, pinasingkedan met ni Dr. Francis Nero, Dean ti UNP College of Nursing nga awan makagatad ti ragsak a mariknada iti agdama gapu iti balligi dagiti dua a topnotcher.
Iti pannaki-uman ti Bombo Radyo Vigan ken ni Nero, nakariknada latta ti panagdanag ta adda ti pagtaltalinaedenda a rating agsipud ta idi napalabas ket nangato ti nagbalin a rating-da.
Ngem nupay kasta, pagyamananna dagiti dua a topnotcher gapu iti balligida nga isu manen ti mangitag-ay iti unibersidad.
Malaksid dayta, pinagyamananna pay ni Cadorna gapu iti suporta nga ipapaay ti administrasionna.
