Nagpalagip ti Philhealth-San Ildefonso kadagiti miembro a saan a dagus a sakup iti baro a polisiya dagiti pasyente a na-admit iti ospital nga awan pay iti 24 nga oras.
Iti pannaki-uman ti Bombo Radyo Vigan ken ni Social Insurance Assistant II John Ranches, para laeng daytoy kadagiti nakaro ti kasasaadna ken agkasapulan iti medical necessity, kas kadagiti pasyente a kasapulan a ma-admit iti Intensive Care Unit (ICU).
Mabalin a maaramat ti Philhealth benefit no pimmusay ti pasyente iti uneg ti 24 nga oras sipud na-admit.
Nailawlawag pay nga idi ket saan a bayadan ti Philhealth dagiti kastoy a kaso ta saan a karaman dagiti pasyente nga awan pay 24 nga oras a na-admit.
Dagiti naideklara a dead on arrival ket saan pay a karaman ta awan met ti medical intervention wenno serbisio nga inaramid ti ospital.
Iti salinong ti baro a pagannurotan, gagem ti Philhealth a mairaman amin a pasyente a na-admit gapu iti seryoso wenno medically necessary a kondision, uray saan nga immabot iti 24 nga oras ti panagtalinaedda iti ospital.
