VIGAN CITY – Naidalanen iti culling operation dagiti walopulo ket maysa a baboy nga adda iti 500 meter radius zone idiay Brgy. Bario-an, Tagudin nga isu ti nakaimalditan ti kaunaan a kaso ti African Swine Fever iti Ilocos Sur.
Iti pannaki-uman ti Bombo Radyo Vigan ken ni Provincial Quarantine Officer Martel Quitoriano, nadumaduma a kadakkel ti baboy ti pinarti ken inkalida a ti kaaduan ket dagiti native.
Gapu ti dayta, nabukel ti Task Force ASF iti probinsia a mangbantay kadagiti animal quarantine checkpoint iti probinsia tapno mabantayan dagiti agipaspastrek iti baboy ken tapno saanen nga agraira pay iti virus kadagiti kadagiti kabangibang a lugar ken impasigurado ni Gov. Ryan Singson a nakasaganada a tumulong ken mangtedda ti tulong kadagiti naapektaran nga agtartaraken.
Impakaawat ni Quitoriano iti publiko a ti isaysayangkatda a checkpoint ket tapno malapdan ti pannakaiserrek dagiti baboy iti probinsia ket maliklikan ti virus.
Kabayatanna, agtultuloy ti pannakikinnammayet ti Provincial Quarantine Office kadagiti kapitan iti tunggal barangay tapno mabantayan ti lugar nga ayanda iti panagraira ti nasao a sakit.
