Umabot iti walo a priority measures ti Marcos administration ti napaspas a napagpatangan iti committee level ken agdama nga adda iti deliberasion ti House Committee on Appropriations para ti naan-anay a panang-pondo segun ken ni House Majority Leader ken Ilocos Norte Rep. Sandro Marcos.
Pinasingkedan ni Marcos a ti panang-aprobar ti committee level dagiti gakat ket mangipakita ti nasayaat a panag-trabaho ti Kamara babaen ti panangidaulo ni House Speaker Faustino Bojie Dy III.
Dagiti gakat ket pakairamanan ti panang-modernisa iti Bureau of Immigration, National Land Use Act, panangbukel ti Independent People’s Commission, Presidential Merit Scholarship Program, panang-amyendar iti Universal Access to Quality Tertiary Education Act, Pantawid Pamilyang Pilipino Program (4Ps) Act, ken Magna Carta for Micro, Small, and Medium Enterprises, kasta met ti gakat a mangikeddeng eleksion iti Bangsamoro Autonomous Region in Muslim Mindanao (BARMM).
Iti kabuklan adda ti limapulo ket dua a priority bills iti salinong ti Legislative-Executive Development Advisory Council (LEDAC) ket sangapulo ket dua kadagituy ket nakapasan iti maikatlo ken maudi a panangibasa iti Kamara.
