VIGAN CITY – Pitopulo ket innem ti bilang dagiti successful blood donor iti kalkalpas a Dugong Bombo Blood Letting Activity iti ili ti Santa a nagbibinnuligan ti Santa-LGU, Ilocos Sur Provincial Hospital Gabriela Silang ken ti Bombo Radyo Vigan.
Ti nasao a blood letting activity ket nakipasetan dagiti motorcycle riders group, residente ti Santa ken Alpha Phi Omega Fraternity and Sorrority group.
Immunan nga inawis ni Municipal Health Officer Dr. Marilou Cardenas dagiti nadumaduma nga organisasyon tapno tumulong iti ganuatda a makaur-or ti ad-adu a dara nga agpaay kadagiti agkasapulan.
Malaksid ti dayta, nakikammayetda pay kadagiti nadumaduma a riders club a kayatna ti makipaset iti aktibidad babaen ti tulong ni Mayor Jesus Popoy Bueno a miembro ti nasao a grupo.
Nupay kasta, nagyaman ti mayor kadagiti naayat a nakipagpaset iti nasao nga aktibidad.
Addan ti 580 a total successful blood donors manipud kadagiti pito nga ili a napanan ti Bombo Radyo Vigan para ti Dugong Bombo 2021.
