VIGAN CITY – Kinarigat iti biag ti nangiduron ti maysa a senior citizen tapno ituloy iti panagadalna a gappuanan ti panagturposna iti Senior High Schooliti strand a humanities and social sciences a with honors idiay Sinait National High School.
Iti pannaki-uman ti Bombo Radyo Vigan ken ni Conchita Yoro, agtawen ti pitopulo ket lima, a taga-Ormoc City, Leyte ngem naikamang idiay Katipunan, Sinait, saanna idi a naituloy iti panagadalna ta narigat ti biagda isu a nagtrabahon agingga nadanon ti pannaki-asawana iti tawen a sangapulo ket walo ket gapu ta naaddaanen ti annak ket nagpokus laengen ti panagbalinna nga ina.
Segun ken ni Yoro, uray addaanen ti walo nga annak ken tallopulo nga apo ket naamirisna a kayatna iti agadal manipod idi natay ti asawana gapu ti colon cancer ta ti panagriknana ket agmaymaysa isunan.
Imbingayna a nangrugi isuna a nagadal iti ALS wenno Alternative Learning System ket idi adda nakadiskubre a mangisursuro iti laingna ken kinadesididona nga agadal ket inallukoyna isuna nga agadal a gappuanan ti panangituloynan.
Kinunana a saanna a pulos nga ibain idi nu adda man ti manguyaw kenkuana gapu iti tawennan ta nangnangruna kenkuana tay arapaapna a makaturpos iti panagadal.
VOICE OF CONCHITA YORO
Plano ni Yoro a sumrek iti tertiary level ta kabaelanna pay laeng iti agadal ket pagpil-piliannan ti kurso ti Cooperative Management inton sumaruno a school year.
Allukoyenna met dagiti tattao a kayatna nga agbasada a saanda a masayang iti kanito a maitited kadakuada kangrunaan kadagiti adda kabaelanna iti biag a makaadal.
VOICE OF CONCHITA YORO
