Napasamak iti nakaru nga uram iti Corniche Hypermarket iti siudad ti al-Kut iti bagatan a paset ti Iraq a gappuanan ti pannakatay iti innem a pulo ket siam a tattao ken nakapukawan iti sangapulo ket maysa nga umili.
Nangrugi iti uram iti pakailak-lakoan dagiti bangbanglo ken cosmetics a posible a gappuanan ti napaspas a panagkayamkam iti uram isu nga adu iti na-trap iti pasdek ket saan nga insigida a nakaruar.
Sumagmamano a bangkay iti kasapulan a mabigbig babaen ti DNA testing gapu ti nakaru a sinagrapda a pannakauram.
Insigida nga imbilin ni Prime Minister Mohammed Shia al-Sudani iti imbestigasyon ken indeklararna ti national mourning.
Pinasingkedan ti gobernador iti probinsia a pilaanda ti kaso ti akin-kukua ti pasdek ken paggatangan, kasta pay nga ingkarina a mairuar ti inisyal a resulta ti imbestigasyon iti uneg iti uppat a pulo ket walo nga oras.
