VIGAN CITY – Addan dagiti ballaag ti Department of Energy para kadagiti power producers ken power distributors tapnu masigurado a makanay iti suplay iti kuryente inton May 13 midterm elections ken tapnu awan iti power shortage a mapasamak a pagam-amkan iti kaaduan.
Inbinsa-binsa ni Director Mario Marasigan ti Electric Power Industry Management Bureau ti Department of Energy iti pannaki- uman kenkuana ti Bombo Radyo Vigan, a masapul nga awan iti panag-commission wennu testing kadagiti planta inton kaaldawan iti panagpipili tapnu awan iti pagparikutan to ti suplay iti kuryente.
Malaksid iti dayta, inbaga pay ti DOE a masapul nga awan iti panagtesting dagiti planta makalawas sakbay ken kalpasan iti eleksyon tapnu masigurado a saan laeng a suplay iti kuryente iti makanay ngem ketdi masigurado pay a dagiti imprastraktura kas iti distribution ken transmission lines ket awan pagparikutan da.
Inpasigurado pay ti opisyal nga addan dagiti nakasagana a contingency plan da nu bilang adda iti saan a mapakpakadaan a panagpukaw iti kuryente iti mismo a kaaldawan iti panagpipili ngem dakkel iti pammati na a saan a mapasamak iti pagam-amkan iti kaaduan.
