Nakemmeg iti ili ti Sta. Maria dagiti innem nga scammer a ti maysa kadakuada ket naireport iti Cabugao Police Station a nanglimlimo iti maysa a pharmacy.
Iti pannaki-uman ti Bombo Radyo Vigan ken ni Police Major Juan Jhayr Maggay, maysa a lalaki ti simrek iti pharmacy ti biktima a nagpa-load babaen iti GCASH.
Kinuna ti suspek a picturanna ti transaksyon isu nga impaima ti biktima ti cellphone kenkuana ngem isu met ti gundaway nga impasana ti PHP35,000 manipud iti Gcash account ti pharmacy iti maysa nga account number.
Naduktalan laengen ti biktima a nalimlimo isuna idi nakapanawen ti suspek babaen iti panang-check-na iti GCash-na isu a nagpatulong kadagiti pannakabagi ti linteg.
Kinita met dagiti pannakabagi ti linteg dagiti CCTV para iti posible a pannakakemmeg ti suspek, naipost ti ladawanna iti social media, ken naipatulod kadagiti private account.
Kabayatanna, maysa a concerned citizen iti ili ti Sta. Maria ti nakakita iti suspek ken dagiti kaduana a mangmangan iti maysa a fast food chain, ken nangala met ti video ti Sta. Maria Police sa da impatulod iti Cabugao Police Station ket kinumpirmaran ti biktima a dagitoy dagiti suspek.
Babaen iti panagkinammayet ti Sta. Maria ken Cabugao Police ket nakemmeg ti suspek agraman dagiti uppat a lalaki a kaduana ken maysa a babai a dagitoy ket agpapada a taga-Sampaloc, Manila.
