Innem a nagaayam iti dado ti nakemmeg iti naiwayat nga anti-illegal gambling operation iti Barangay Ayusan, Vigan City, Ilocos Sur.
Dagiti suspek ket agtawen iti tallopulo ket pito a lalaki ken agtawen iti uppat a pulo ket uppat a lalaki nga agpada nga agnaed iti nasao a lugar.
Karaman pay ti agtawen iti limapulo a lalaki a taga-Pantay Laud, lalaki nga agtawen iti uppat a pulo ket walo a taga-Pantay Daya, babai nga agtawen iti uppat a pulo ket uppat ken ti lalaki nga agtawen iti uppat a pulo ket maysa, agpada a taga-Barangay Pantay Fatima.
Naaktuan dagiti suspek a nagaayam iti dado ket nakumpiskar kadakuada ti poker chips, dado paraphernalia, maysa a lamisaan, sangapulo ket pito a plastic chair ken pusta a P9,290.
Kaso a panaglabsing iti Presidential Decree 1602 wenno Anti-Illegal Gambling Act ti sangwen dagiti suspek.
