VIGAN CITY – Maisayangkat inton November 25 agingga November 27 iti maika lima a Gov. Ryan Singson Rescuelympics iti Kannawidan grounds, Tamag, Vigan a gagemna a mangadal ken mangipalagip kadagiti rescuers a makisalip no aniya dagiti maaramid no adda dagiti dumteng a didigra.
Segun kenni Michael Chan, mangidaulo ti Ilocos Sur Provincial Disaster Risk Reduction and Management Office, dua pulo ket pito nga ili iti manamnama a makisalip ti rescuelympics tatta a tawen a nakairamanan dagiti kameng ti Philippine National Police, Philippine Army, Bureau of Fire Protection, Coast Guard ken Ilocos Sur Provincial Jail.
Inlawlawag ni Chan a dagiti aktibidad a paset ti pasalip ket isunto iti pangipadasan dagiti contestant kadagiti immun-unan a naadal da nu kasanu iti mangrescue kadagiti biktima ken kasanoda a makaruwar kadagiti obstacle a nakaipatakder iti venue ti rescuelympics.
Ti agkampeon iti nasao a pasalip ket makaawat ti sangagasut a ribo a pisos a gatad ti rescue equipment.
