Maibilangen nga abogado ti agtawen-iti-limapulo ket siam a ni Atty. Eduardo Regio kalpasan a pimmasa iti 2025 Bar Exam nga isu ti maika-sangapulo ket maysa a gundawaynan nga ag-exam.
Iti pannaki-uman ti Bombo Radyo Vigan ken ni Atty. Regio, nalaus ti panagyamanna iti Namarsua ta naited met laeng kenkuanan ti nabayagen nga ar-arapaapenna.
Inspirasyonna ti pamilia a nangsuporta kenkuana ken dagiti tao a namati iti kabaelanna tapno saan a sumuko uray namin-adu a daras a napaay.
Kunana a karit kenkuana a saan a nalaing nga ag-Ingles ngem inadalna no kasano ti husto a wagas iti panagsungbat kadagiti saludsod iti exam.
Kalpasan ti exam, intaleknan ti resulta iti Dios ta ammona nga impaayna amin a kabaelanna iti exam.
Iti agdama, plano ni Regio ti makatulong kadagiti agkasapulan iti tulong legal nangruna la unay dagiti tattao a kayatna a mailaban ti karbenganda ken maipaayan iti hustisia.
