VIGAN CITY- Inaprubaranen ti National Food Authority (NFA) Council ti panagangkat ti lima gasut a ribo a tonelada a bagas a nayon ti 250 metric tons a bagas nga immunan a naaprubaran a maangkat tapno umadu ti stock ti nalaka a bagas.
Ti pannaki-uman ti Bombo Radyo Vigan, naibaga ni NFA spokesperson Rex Estoperez a ti nasao nga addang ket kas panangtungpal da iti pammilin ni Presidente Rodrigo Duterte a paadduen ti buffer stock ti NFA ken mapagtalinaed ti ado a suplay kadagiti pagtagilakwan.
Ti agdama ket awan pay ti pagilian a napili a pagangkatan ti NFA ti bagas ta addan to pay ti mapasamak a bidding ket ti bidder a mangidiaya ti kalakaan a presyo ti mapili.
Malaksid iti dayta ket patien ni Estoperez a ti panagangkat ti nayon a bagas ket addang tapno malapdan ti rice hoarding ta no saan to pay laeng nga iruar dagiti hoarders ti ipenpenpen da a bagas sakbay a sumangpet ti maangkat ket saan danton a mailako ta nalaklaka ti presyo ti NFA.
