Impila ni Manila Rep Rolando Valeriano iti Kamara ti maysa nga house resolution a mangitandudo nga agipatungpal ti emergency measure ti administrasion tapno kissayan ti 50% ti toll fees iti amin nga expressway ti pagilian iti tengnga ti agtultuloy a panagngato ti presio ti produkto petrolyo.
Iti Resolution 879 ni Valeriano ket karkariten na ni Presidente Ferdinand Marcos Jr. nga agdeklarar State of Imminent Disaster iti salinong ti Republic Act No. 12287 ken Republic Act No. 10121 a ti basaran ket ti panagngato ti presio ti langis a maaddaan ti domino effect iti presio dagiti kangrunaan a magatang ken plete.
Pinasingkedan ni Valeriano ano ngumatngato ti presio ti produkto petrolyo ket ngumatngato met ti operating costs dagiti public transport operators, logistics companies ken private motorists.
Mamati pay ti opisial a malapdan ti panagngato ti inflation rate no makaaramid a dagus ti addang ti gobierno a matulongan dagiti adu a Pilipino iti panagngato ti presio ti produkto petrolyo.
