VIGAN CITY – Naipaagas iti ospital dagiti dua a nagmaneho ti lugan a nagsinnapgid idi parbangon idi kalman idiay Barangay Paratong, Sta. Cruz.
Agpapa-abagatan ti delivery truck a minaneho ni Michael Santos nga agtawen ti tallo pulo ket uppat nga agnaed idiay Santo Rosario, San Luis, Pampanga idinto a ti nagmaneho iti Hyundai van a ni Lero Boy Manalo, agtawen ti tallo pulo ket maysa nga agnaed idiay WoodHills, Quezon City nga agpapa-amiyanan idi mapapati nga inagaw ni Santos iti linya ni Manalo isu a nagsinnagid dagiti dua a lugan a poon iti nakadunuran dagiti dua a driver.
Kabayatanna, naipan idiay Ilocos Sur District Hospital Narvacan ni Mark Gerald Norderte, agtawen ti dua pulo ket lima, empleyado ti hotel, baro nga agnaed idiay Cadacad, Burgos ta nadunor ti ulo na idi naidungpar idiay arko ti Barangay Suso, Sta. Maria.
Agpapa-amiyaman ni Norderte idi makadanun iti nakapasamakan iti aksidente ket mapapati a napukaw na iti kontrol iti manibela iti nagluganan na a motorsiklo ket naidungpar iti arko ti nasao a barangay a poon iti nakadunuran na.
Idiay met ili ti Bantay, nadunor iti naduma-duma a paset iti bagi dagiti nagmaneho iti traysikel ken motorsiklo a nagtinnukbob idi kalman idiay Barangay Cabaroan.
Nabigbig ti minaneho ti Honda 155 tricycle a ni Reynaldo Villafranca, agtawen ti lima pulo ket walo, naasawaan nga agnaed idiay Barangay Aggay, Bantay idinto a ti nagmaneho iti Kawasaki motorcycle ket ni Monserrat Stevens Pescador, agtawen ti tallo pulo ket maysa, baro nga agnaed idiay 2A Madison Place 7 Main Ave Bagong Lipunan ng Crame, Quezon City.
Agpada nga agpapadaya a direksyon dagiti dua a lugan idi bigla a nagsikko iti tricycle nga isu iti akin-sango isu a natukbob ti sumar-saruno a ni Pescador iti akin-likod a paset iti tricycle a poon iti nakadunuran da a dua kenni Villafranca.
