VIGAN CITY – Uppat a gasut innem a pulo ket siam a pagadalan ti naaprubaran a mangisayangkat iti face-to-face classes inton Lunes, March 21 pakairamanan dagiti duapulo ket dua nga immun-unan a nangisayangkat a daytoy ket katukad iti 97.42 percent kadagiti amin a pagadalan iti probinsia nga Ilocos Sur.
Iti pannaki-uman ti Bombo Radyo Vigan ken ni DepEd Ilocos Sur Assistant Schools Division Superintendent Nestor Heraña, innem a grupo ti nabukel a napan nangkita kadagiti pagadalan no kasano ti panagsaganada ken no sinurotda met la amin a safety protocols ta daytoy ket maidanun iti regional office para ti pannaka-aprubarna.
Sangapulo ket dua laeng ti masapul a bilang dagiti sumrek a Kindergarten idinto a duapulo iti Grade 1 agingga Grade 12 tapno masurot ti social distancing measures.
Dagiti mangisursuro ti mangilawlawag dagiti module para kadagiti agad-adal ngem addanto met laeng maituding a trabahoen dagiti ubbing no agawidda.
Saan a mapursar amin nga ubbing nga agatendar iti face-to-face classes ta no saan nga ipalubos dagiti nagannak ket adda latta maited a modules kadakuada ken bayabayan ida ti nagannakda ken mangisursuro.
Rebbengna a dagiti on-site teacher ket nabakunaan ta dagiti unvaccinated ket saan a mapalubosan nga agisuro no di ket ituloyda laeng ti ag-work from home.
Impasigurado ti opisial a matignayan no ania dagiti makitada a pagkurangan para ti pannakaisayangkat ti expanded face-to-face classes ken mangnamnamada a saanen a sumayaaten ti sitwasyon ti Covid19 tapno agtultuloy metten ti pisikal a panagklase dagiti agad-adal. Nabalakadan met dagiti nagannak a saan pay laeng a nangipalubos kadagiti annakda para iti face-to-face a no kayatdanton ket mabalinda laeng ti agpailista kadagiti pagadalan.
