47 a Pilipino, matmatay iti kada aldaw gapu iti arak – Rep. Ismula

Maisingsingasing ita iti Kongreso ti pannakaipangato ti buwis iti arak gapu ta 47 a Pilipino ti matmatay gapu iti daytoy a bisyo iti kada aldaw.

Segun ken ni Akbayan Partylist Rep. Dadah Kiram Ismula, panawenen tapno ingato ti buwis iti arak ta malaksid a dakes iti salun-at ket isu pay ti rason no apay nga adu ti matmatay iti aksidente.

Iti salinong ti gakat, maingato iti P88 ti ad valorem tax iti kada litro ti arak manipud iti agdama a P48 idinto a ti specific tax a P47 ket kayat ni Ismula a pagbalinen a P109 kada litro.

No agbalin a linteg, tinawen a ngumato dagiti buwis a masingir iti kada litro ti arak karaman ti excise ken value added tax a singsingiren dagiti manufacturer kadagiti consumer.