Nairekord ti Department of Health (DOH) iti uppat a pulo ket innem a kaso ti bronchial asthma ken acute exacerbation iti pagilian ket posible a manayunan pay kagiddan ti panangsarabo iti baro a tawen.
Segun ti DOH, bassit pay laeng iti agdama a tally ngem sagsaganaandan iti panagado ti pasyente nga adda lung condition na ta adu dagiti lugar ti agselselebrar iti New year nga agar-aramat iti paputok.
Nabalakadan dagiti narisgo iti nasao a sakit nga agaramat iti N95 masks wenno surgical masks wenno abbungan iti agong ken ngiwat babaen ti nabasa a labakara bayat ti fireworks display tapno maliklikan ti smoke exposure.
Kabayatanna, imbaallaag ti DOH iti publiko iti peggad ti panagaramat ti firecrackers ita a holiday season ket inallukoyda laengen nga agbuya iti community fireworks display nga intuding iti professionals.
