Simmangpet iti Pilipinas iti 442 a Plipino manipod United Arab Emirates (UAE) a naglugan iti government-assisted flight ita nga aldaw iti baet iti tensyon idiay Middle East kas pinasingkedan ti Department of Migrant Workers (DMW).
Segun ti DMW, karaman iti nasurok duagasut nga overseas Filipino workers (OFWs) iti flight a simmangpet itay alas dose iti aldaw iti Ninoy Aquino International Airport (NAIA) Terminal 3 idiay Pasay City.
Kadua ti ahensya iti operasyon ti Overseas Workers Welfare Administration, Department of Social Welfare and Development, Department of Health, TESDA ken Bureau of Immigration.
Kinuna ti DMW a ti natalged a panagsubli dagiti Pilipino a naapektaran idiay Middle East Crisis ket tignay iti bilin ken paset ti Post Repatriation Assistance iti gobierno ni Pres. Ferdinand Marcos Jr.
Nagyaman met dagiti Pilipino a naglugan iti flight ken ni Pres. Marcos babaen iti video nga imbingay ti Migrant Workers Secretary Hans Leo Cacdac.
