Nasurok a 40,000 a polis ti maideploy iti intero a pagilian para iti seguridad ita a panawen ti Paskua, segun iti Philippine National Police (PNP).
Paset daytoy ti Oplan Ligtas Paskuhan ti PNP, ken naing-inget ti seguridad kadagiti lugar nga adu ti tao na, kas kadagiti mall, simbaan, terminal, ken tourist destinations.
Nupay awan ti makita a nakaro a pangta, agtultuloy nga alerto ti PNP tapno malapdan ti riribuk dagiti terorista ken dadduma pay a kriminal a grupo iti panawen ti Paskua ken Baro a Tawen.
Mangrugi ti heightened alert ti PNP inton Disiembre 15, maysa nga aldaw sakbay ti panangrugi ti Simbang Gabi, agingga iti January 10 inton sumaruno a tawen.
Malaksid dayta, nakamonitor pay ti PNP ti anibersario ti Communist Party of the Philippines (CPP) inton Disiembre 26, gapu iti posible a panangatake ti New People’s Army (NPA).
Adda met mainayon a puersa manipud iti Special Action Force a mangpatibker kadagiti police station a mabalin a rauten dagiti rebelde.
