VIGAN CITY – Maipatungpal ti 4-day work week iti ili ti Santa gapu iti mapaspasaran a kinabara ti paniempo.
Iti pannaki-uman ti Bombo Radyo Vigan ken ni Mayor Jesus “Popoy” Bueno, ti addang ket tapno mayyadayo dagiti empleado iti sakit a mabalin a parnuayen ti nabara a tiempo.
Kunana a saan a makapagserbi a nasayaat dagiti empleado no nabara a tiempo isu a panawenen tapno kissayanda ti aldaw iti inda panagtrabaho.
Nupay kasta, mangrugi iti alas syete iti bigat agingga alas sais iti rabii ti oras ti trabaho iti nasao nga ili ken agpatingga laeng iti aldaw ti Huebes.
Innayon ti mayor a temporaryo laeng ti pammilin ta agsublinto met laeng iti normal no sumayaaten ti kasasaad ti paniempo.
Mailaksid iti pammilin dagiti adda iti essential service kas ti Municipal Disaster Risk Reduction and Management Council, Rural Health Unit ken ti Santa Police Station.
