Uppat a lallaki ti nakemmeg gapu iti gandatda a mangholdap iti maysa a lalaki a nakalugan iti kotse iti Pacheco Street, asideg iti corner Osmeña Street, Barangay 67, Tondo, Manila.
Nabigbig ti biktima a ni Mark Anthony Dela Cruz, agtawen iti uppat a pulo ket tallo, taga-Barangay Rizal, San Antonio, Zambales.
Dagiti met suspek ket da Rhandi Almer Alcaide, agtawen iti duapulo ket siam ken ni Alcaide Manlutac, agtawen iti duapulo ket innem, Luke Alcaide Manlutac, agtawen iti duapulo ket innem, Kester Enriquez Valdez, ken ni Franco Abangon Magbanua, agtawen iti duapulo ket dua, agpapada a taga-Barangay 117, Tondo, Manila.
Iti pannaki-uman ti Bombo Radyo Vigan ken ni Police Captain Karl Danielle Queddeng, adda iti uneg ti luganna ti biktima nga agdaldalyasat iti Pacheco street idin pinasardeng dagiti uppat a lallaki a suspek ket pinalawlawanda ti biktima.
Inigganan ti maysa a suspek ti tawa ti lugan ti biktima idinto a ti maysa pay a suspek ket nakaiggem iti kutsilyo a nakaipaturong iti biktima, sa na pinangtaan a patayenna ken itedna ti cellphone ken bagna.
Ti met maysa pay a suspek ket pwinersana a linukatan ti compartment ti lugan ti biktima bayat a nakaiggem iti bato.
Nakita dagiti dua a witness ti pasamak ket dagus a nagpatulongda kadagiti nakaduty a tanod iti asideg ti barangay ket nagrespondeda.
Ngem nupay kasta, nakadlaw dagiti suspek iti isasangpet dagiti barangay tanod isu a dagus a naglibasda.
Apaman a nakatawag ti biktima iti 911 Emergency hotline ket nabalakadan a saan pay laeng nga aglukat iti kotsena agingga nga awan dagiti sumangpet a kapulisan.
Babaen iti 3-minute response a pammilin ni PGen. Nicolas Torre III ket dagus a nagresponde dagiti kameng ti Don Bosco AOR ket nangiwayatda iti follow-up operation a nakakemmegan dagiti tallo a suspek idinto a ti maysa ket simmuko iti barangay ken naiturn-over iti kapulisan.
Sangwen dagiti suspek ti kaso nga Attempted Robbery.
