Umaboten iti 4,192 a pamilia wenno 12,641 nga indibidual ti naapektaran iti habagat kadagiti 21 a local government unit iti Ilocos Sur.
Pakabuklan a 151 a barangay ti karaman kadagiti naapektaran a lugar.
Iti pannai-uman ti Bombo Radyo Vigan ken ni Governor Jerry Singson, 206 a pamilia wenno 613 nga indibidual ti adda iti uneg dagiti evacuation center, idinto a 159 a pamilia wenno 613 nga indibidual ti adda iti ruar ti evacuation center.
Kabayatanna, 19 a pagtaengan ti nadadael pakairamanan ti maysa a totally damaged ken 26 a partially damaged.
Karaman kadagiti LGU a nangireport iti damages ti Santiago, Narvacan, Sto. Domingo, Alilem, Suyo, San Vicente ken Sta. Cruz.
Nangipaay met iti hot meals dagiti LGU kadagiti apektado nga agindeg, agraman ti 164 nga indibidual iti Vigan City ken 12 nga indibidual iti Sto. Domingo.
Agtultuloy a bambantayan dagiti otoridad ti epekto ti habagat kagiddan ti agtultuloy a tudo ditoy probinsia.
