VIGAN CITY – Tallon ti nagpositibo ti COVID- 19 idiay probinsiya ti Abra a kas kinumpirmaran ti Provincial Health Office – Provincial Epidemiology Surveillance Unit (PHO- PESU).
Idi March 28, kinumpirmaran ti PHO- PESU iti maikadua a kaso ti COVID- 19 idiay Abra nga inawagan da ti AC2, maysa a lalaki nga agtawen ti 48 nga agnaed idiay Gangal, Sal-lapadan, Abra ken close contact ni AC1 nga isu iti umuna a nagpositibo iti nasao a sakit idiay Abra.
Agsipud iti dayta, nailockdown dagiti barangay ti Naguilian, Subusob ken Gangal.
Kabayatanna, itatta nga aldaw, kinumpirmaran ti PHO- PESU iti maikatlo a kaso iti nasao a sakit idiay Abra nga inawagan da ti AC3, maysa a lalaki nga agtawen ti 73 a taga- Naguilian, Sallapadan nga ama ni AC2.
Segun ti report, ti pasyente ket adda ti chronic obstructive pulmonary (lung) disease ni AC3 sakbay a naduktalan a nagpositibo ti COVID- 19.
