Impasigurado ti Department of Social Welfare and Development nga adda tallo milion a karton ti family food packs kadagiti 938 a bodega iti intero a pagilian bayat ti panagsagsagana kadagiti sumangbay a bagyo iti panangrugi ti panagtutudo.
Segun ken ni DSWD Secretary Rex Gatchalian, daytoy ket kas maisurot kadagiti pammilin ni Presidente Ferdinand Marcos Jr a siguraoden ti natalged a kasasaad dagiti Pilipino nga aggigyan kadagiti rehion a masansan a malayus.
Impatungpal ti DSWD ti Buong Bansa Handa (BBH) isu nga adda tallo million nga stockpile dagiti family food packs para iti naalisto ken naannayas a disaster response operation.
Ti BBH program ti ahensia ket maysa a whole-of-nation ken whole-of-government approach a napagtitipon dagiti resources ti gobierno ken pribado a sektor a mangidaldalan iti naalisto ken komprehensibo a panagresponde.
