Naipayaan iti saggaysa a transport vehicle dagiti tallopulo ket innem a barangay iti ili ti Sta Lucia kas paset iti programa ti municipal developmental council.
Iti pannakiuman ti Bombo Radyo Vigan ken ni Mayor Joseph Simon Valdez, ti programa ket paset iti priority proposal dagiti mannalon iti ili.
Segun ken ni Valdez, maaramat dagiti lugan no adda dagiti dar-ayan a seminars ken aktibidad dagiti mannalon ken bumarangay iti kabangibang nga ili ken kaasideg a probinsia.
Kabuklan nga uppat a pulo a transport vehicle ti ginatang ti lokal a gobierno no sadino ti 36 ket naipaay iti amin a barangay ti ili ken ti nabatbati nga 4 ket maited to met laeng no adda makita a panagkurang ti transportation unit.
Kalaksidan iti 40 a transport vehicle, impanamnama ti mayor nga adda pay dua a coaster buses a karaman iti P69 milyon pondo a naialtang para iti nadakamat a proyekto.
