Tallopulo ket uppat a pakete iti mapapati a shabu iti nasarakan iti taaw dagiti uppat a mangngalap idiay Barangay Mantanas ken Barangay Dili, Sta. Cruz, Ilocos Sur itattay, June 7, 2025.
Iti pannaki-uman ti Bombo Radyo Vigan ken ni PMaj. Vinsent Paul Tadeo manipod Sta. Cruz Municipal Police Station, maysa a sako nga adda duapulo ket dua a pakete iti mapapati a shabu wenno aggatad iti P149,600,000 iti nasarakan dagiti dua a mangngalap iti kabaybayan idiay Barangay Mantanas, 30 nautical miles manipod iti shoreline idinto a nasarakan dagiti dua a mangngalap iti sangapulo ket dua a pakete iti mapapati a shabu iti kabaybayan idiay Barangay Dili, 35 nautical miles manipod shoreline.
Segun ken ni Tadeo, tunggal pakete ket mapatta-patta nga agdagsen iti maysa a kilo isu a posible nga umabot iti tallopulo ket uppat a kilo iti kadagsen iti amin a nasarakan a mapapati a shabu.
Dagiti nasarakan a mapapati a shabu idiay Mantanas ket adda label-na a dried durian idinto a dagiti nasarakan idiay Dili ket adda label-na a Chinese tea.
Sakbay iti pannakasarak kadagiti nasao a pakete iti mapapati a shabu ket nakitaripnong dagiti otoridad kadagiti mangngalap iti nasao nga ili ta binagaanda ida nga ipakaammo laeng kadakuada nu adda masarakanda a kontrabando.
Dayta ket kalpasan nga adda nasarakan kadagiti nadumaduma a paset iti pagilian nangruna iti kabaybayan a paset idiay Pangasinan partikular idiay Bani, Agno ken Bolinao kadagiti nakapakete a mapapati a shabu.
VIDEO – PMAJ VINSENT PAUL TADEO
Pinasingkedan ti maysa kadagiti mangngalap a nakakita a nagtakada idi nakitada ti sako a tumtumpaw isu nga inasitganda.
Segun ken ni Diosdado Cabuenas Jacildo, agtawen iti limapulo ket walo, naasawaan a taga-Barangay Mantanas, Sta. Cruz, ti kanakanna a ni Erwin Guieb Abillan nga agtawen iti uppat a pulo ket uppat iti immuna a nakakita iti sako isu nga inkeddengda a kinita ngem idi linukatanda ket nakitada a nakasurat iti “Freeso-Dried Durian” ket idi kinitada iti unegna, inladawanna dagitoy a nasileng a puraw a babassit a bato.
Gapu ta saanda nga impagarup a mapapati a shabu ket inkargada iti bangka ket inyawidda iti lugarda ken in-turn over da iti Barangay Captain nga isun ti nangireport kadagiti pannakabagi ti linteg.
Inlawlawagna a duapulo ket lima a pakete iti mapapati a shabu iti nasarakanda ngem idi kinita dagiti otoridad iti tunggal pakete ket adda tallo a narunaw iti kargana a mapapati a nastrek iti danum.
VIDEO – DIOSDADO CABUENAS JACILDO
