VIGAN CITY – 333,000 a kilo iti irik ti target ti National Food Authority ken ti Santa Local Government Unit a gatangen kadagiti mannalon iti nasao nga ili babaen iti programa a Palay Marketing Assistance Program for Legislation and Local Government Units (PALLGU) ti NFA.
Manipud iti 19 pesos per kilo a panaggatang ti NFA iti Class A ken 18 pesos iti Class B ket nayunan ti tres pesos ti ili a Santa isu nga agbalin a 22 pesos ti Class A ken 21 pesos met ti Class B.
Kagiddan iti signing iti memorandum of agreement ita nga aldaw, kinuna ni Vice Mayor Jeremy “Jesus” Bueno a ti addang ket resulta ti panagtitinnulong ti liderato iti ili ti Santa ken stakeholders kalpasan ti panagtataripnongda no ania dagiti mabalinda maipaay a pagsyaatan dagiti mannalon iti baet ti nangina a farm inputs.
Nangpili ti LGU-Santa iti maysa nga organisasyon dagiti mannalon nga isu ti Santa Federated Farmers a kapatang ken katransaksyon ti NFA ket isuda ti mangbigbig no siasino kadagiti miembroda ti interesado a mangilako iti apitda iti NFA ken tapno masigurado a dagiti apit a gatangen ti NFA ket naggapu met laeng iti ili ti Santa.
Ti addang ket maysa a pilot testing pay laeng tapno makita pay nga umuna ti prosesona ken no kasano pay a mapapintas, agsipud ta narigat ti agirugi nga insigida iti dakkel a programa no saan a masigurado ti gatangen ti NFA wenno saan met a mabigbig nga insigida dagiti interesado.
Ngem no makita a napintas ti resultana ken adu ti interesado, mabalinto a mailatangan iti dakdakkel a pondo para iti sumaruno a rollout.
