Naipaayen ti nalawa a relief operation ti Philippine Red Cross nga aggatad ti nasurok P300 milion para iti rinibo a pamilia a biktima ti nagsasaruno a kalamidad a dimmuprak iti pagilian.
Segun ken ni PRC Chairman ken CEO Richard Gordon, target ti ahensia a maikkan ti tulong ti 23, 242 a pamilia manipud iti sangapulo ket pito a probinsia.
Karaman iti nadakamat nga operasion dagiti residente a natamaan ti ginggined idiay Cebu ken Davao Oriental, kasta pay dagiti nalayus gapu ti Bagyo Tino ken Uwan.
Idi napalabas nga aldaw, umabot iti 4, 078 a pamilia ti dagus a nakaawat ti food packs ken non-food items iti sangapulo ket lima a probinsia nga aggatad ti P14.8 milion.
Karaman kadagiti benepisyaryo ket dagiti residente manipud Northern Luzon, partikular idiay Cagayan, Isabela ken Aurora, agingga idiay Visayas ken Mindanao pakairamanan ti Negros, Surigao, ken Palawan. Reynand Fontejon
