VIGAN CITY- Umabot iti ginasut a residente ti nagbakwit idiay Maui, Hawaii, nangruna idiay Lahaina, Maui gapu ti napasamak a brush fire sakbay iti panaglandfall ti Hurricane Lane.
Ti pannaki-uman ti Bombo Radyo Vigan ken ni Bombo Correspondent Rey Patao a taga-Bantay, Ilocos Sur ngem agnanaed itan idiay Kahului, Maui, inbaga na nga immabot iti 300 acres iti immuna a naapektaran gapu ti brush fire ngem maibasar ti rekord dagiti maseknan nga ahensya, immabot iti 1,500 acres iti naapektaran ti uram.
Gapu ti dayta, maysa a residente ti nadunor ken adda pay dagiti sumagmamano a pagtaengan a naapektaran gapu ti uram a mapapati nga aramid iti maysa a saan pay a nabigbig a lalaki.
Maibasar iti impormasyon a naurnong ni Patao, adda dagiti nakakita a residente iti nasao a lugar ti lalaki a nakabisikleta a naggapu iti nangrugiyan ti uram nga isu ti tudwen da nga akin-aramid iti pasamak.
