3 ti nakemmeg babaen iti warrant of arrest iti agduduma nga ili iti Ilocos Sur.
Nakemmeg ti maysa a lalaki a sumangsango iti kaso idiay Barangay Bannuar, San Juan.
Ti akusado ket agtawen iti tallopulo ket tallo, agnaed iti Barangay Guimud Sur.
Nakemmeg daytoy babaen iti bileg ti warrant of arrest gapu iti pito a bilang ti kaso a Theft.
P10,000 iti kada bilang ti kaso ti nailatang a piansa para iti pannaka-wayawayana.
Idiay Barangay Rizal, Cabugao ket nakemmeg met ti maysa a lalaki nga agtawen iti tallopulo ket pito, taga-Barangay Baclig.
Ti akusado ket sumangsango iti kaso a Reckless Imprudence Resulting in Double Homicide and Damage to Property.
Nailatang ti P36,000 a piansa para iti pannaka-wayawayana.
Kabayatanna, idiay met Fuerte, Caoayan, nakemmeg ti maysa a babai nga agtawen iti duapulo ket lima gapu iti saanna a panagparang iti korte para iti naituding a hearing iti panaglabsingna iti Ecological Solid Waste Management Act of 2000.
P1,000 ti naituding a piansa para iti pannaka-wayawayana.
