VIGAN CITY – Nakapagpyansan dagiti tallo a nakemmeg a nagsusugal idiay Brgy. Lungog, Narvacan idi kalman November 27, 2020.
Iti pannaki-uman ti Bombo Radyo Vigan ken ni PCapt. Arcadio Viloria, Narvacan Municipal Police Station, na-release-n da Estrella Parel, agtawen ti pitopulko ket uppat, balo; Cory Pacano, agtawen ti tallopulo ket tallo, naasawaan; ken Milagrose Sausa, agtawen ti innem a pulo, balo nga agpapada nga agnaed iti nasao a lugar.
Segun ken ni Viloria, naisayangkat iti operasyon ta adda iti nangipakammo kadakuada nga adda iti nagsusugal iti lugar a gappuanan iti panagrespondeda ket nakatakuatanda nga agaay-ayam iti tong-its dagiti suspek.
Pinasingkedanna nga umuna pay laeng a gundaway ba nakemmeg dagiti suspek ta awan iti rekordda idi kallabes.
Ti nasao nga operasyon ket nakaalaan dagiti pannakabagi ti linteg iti maysa a set iti baraha, maysa a monobloc a lamisaan, tallo a monobloc a tugaw ken ti pusta nga aggatad iti 1,046 a pisos.
